5
Amɔɔ -nyʋ 'a 'blʋa jeʋn "klein -ʋʋ -tia" 'de Sudɛn -gbuu 'a 'jrʋ 'a i blu 'na fɔo ke Kanaa nyʋ 'a 'blʋa jeʋn "klein -nɩa 'de Meditelane' wɔin 'wɩɩn ka Nyɔsoa maa Sudɛn 'de Israɛ -nyʋ "juɛi mamaʋ 'sʋ ʋʋ jeɛ cɛn. 'Sʋ 'kpɩ wa ʋʋpʋ "i, ʋʋ seɛ 'bɛɛ ʋʋ 'je Israɛ -nyʋ "juɛi i nyna. 2 'De ɛɛ' nɔ" tu 'di ɛ, Nyɔsoa wluɛ Sosue' -pee ka: -Ɩn nʋ "soi nyʋ a 'daa Silɛsɩ -cnɛ 'ʋn -ɩn -je Israɛ -nyʋ 'a "ji 'sɔɔn -nɩ bʋ i jre-.3 Sosue' 'bleɛ -cnɛ -nʋa Silɛsɩ 'ʋn -wɛe ɔ kpa Israɛ -nyʋ 'klɛn 'de crʋ nyɔ ɔ 'daa Aralɔtɩ "kpei
4 Dɛɛ -tɩ Sosue' a kpa nyʋ -bɛɛa' tʋ -fɔan' 'klɛn ɛ ka: "nynuʋ nmai -wee' "klein -ʋʋ -wlʋa Esipʋ -wee' 'mɛɛ 'de -jei" -ta ʋʋ wlʋa Esipʋ 'sʋ ɛ, 'de -pɩɔn" blʋa "kpei. 5 Ʋʋ -wee' "klein muɛ 'klɛn 'kaa -jʋʋ -wlʋa -mɛ ʋʋ nɩɛ 'de -pɩɩɔn" blʋa "kpei -mɛ ʋʋ 'wlʋɛ Esipʋ dee' 'ʋn -mʋ se 'klɛn mu. 6 'De -sʋn 'a kwla -nyiiɛ' 'di, Israɛ -nyʋ 'na 'de -pɩɩɔn" blʋa "kpei mamaʋ 'sʋ nyʋ -bɛɛa' tʋ -fɔan' -mɛ ʋʋ nɩɛ Esipʋ 'wlʋa -wee' "klein je -kwɛ. Dɛ-nʋɛ', ʋʋ se Nyɔsoa wɔn 'je, Nyɔsoa -cɛan' wlu -tie" -ɛ -na ʋʋ se ʋʋpʋ "i "taa i ʋʋ se crɔn' 'blʋa -ɛɛ wlu ɛ cɛan -tie" 'de ʋʋa' "bɛma -pee 'di pa i. 7 'Kaa Nyɔsoa pooɛ ʋʋpʋ ʋʋa' "nynuu -sea' 'klɛn mu -kɔ o: "nynuu -nʋ mʋ Sosue' a kpa 'klɛn dɛ-nʋɛ' -ta ʋʋ nɩa naa' 'de -pɩɩɔn" blʋa "kpei ɛ ʋʋ se 'klɛn mu.
8 'Blʋa -wee' "klein 'a 'klɛn kpaa' -kwɛa 'sʋ ɛ, ʋʋpʋ -wee' -teɛ i 'de ʋʋa' -kwlena' mamaʋ 'sʋ 'klɛn je 'bɔ 9 -Wɛe Nyɔsoa wlu 'de Sosue' -pee ka ɛ 'na: Dɛ -jɛa -sɩan a, 'ɩn tɛn ɛ aopʋ -tɩn' -ke ao 'wlʋa Esipʋ o. Ɛmɛ -tɩ ɛɛ' -ta -tu 'a 'nynɩ nɩ Kilgalɩ, 'nynɩ -nɩɛ "kpei -sɩan ke ɛ.
Pakɩ 'a -kɔ' po -tɩ
10 Nɔ" -ɛ 'di Israɛ -nyʋ nɩa 'de Kilgalɩ ɛ, ʋʋa poɛ Pakɩ 'a -kɔ' 'cʋ 'a 'wɩ 'a -puue 'jɔ -nyiiɛ' -nɩ "kpei 'de Seriko 'a -pɩɩɔn" blʋa 'a wlao 'di. 11 Pakɩ 'a -kɔ' 'ɔ -sɔn' dee -sɩan' 'sʋ ʋʋ diɛ ʋʋa' 'blʋa 'di diidɩ: -Dipɛn' -pʋn" dɛ sea o mu ke dɩ 'a 'jɔ -daa ke. 12 'Wɩ -jɛ tba 'de -mɛ 'de 'sʋ 'Manɩ 'bɔ 'wla -tɩ 'mɛ dɛ-nʋɛ' ʋʋ bɛɛ' ʋʋ 'je ʋʋ "bli diidɛ 'je ʋʋ 'je di; Israɛ -nyʋ -nɩa 'kmʋ 'bɔ 'Manɩ 'je -tɩ 'mɛ 'bode dɛ-nʋɛ' ʋʋ 'bɛɛ ʋʋ 'je ʋʋa' croodɩ 'a 'jɔ -nɩa 'de Kanaa di 'de ɛɛ' -sʋn -tu 'di.
Kea 'a "sooa 'a "jrukpɔ i 'a jia'
13 'Wɩ deejrɛ' 'di 'sʋ Sosue' nyniɛ 'de Seriko -pʋn", ɔ kpa "jri "jɛi 'sʋ ɔ 'jeɛ "ju jrɔ' -sa -placnɛ kpla' -ɔ -bleɛ kwa -ɔ -nyna i 'de ɔ "juɛi. Sosue' 'kpaa 'de ɔ -pʋn" -wɛe ɔ -tee' ɔ i ɔ 'na: -Ɩn -nɩɛ -aa nyɔ -o -ae" -ɩn -nɩɛ -aa tʋ nyɔ -o?
14 'Sʋ "ju -nɔ 'na: "Ɩɩn-, 'ɩn nɩɛ Nyɔsoa 'a "sooa -nɩa 'de jaʋn 'di 'a "jrukpɔ i -tei -o 'ma ji -nɩ ka.
'Sʋ Sosue' jiɛ ja, ɔ tba "jua i 'de 'blʋɔ, -wɛe ɔ 'na: Tʋbo" 'ɩn nɩɛ -ma dbo nʋ i -o, dɛ -ɩn -nɩ "i 'ɩn 'je nʋɛ-? 15 Nyɔsoa 'a "sooa "jrukpɔ i -tei -nɩa 'de jaʋn 'di 'na: -Ɩn -sa "kwlai 'bɩ dɛ-nʋɛ' -ta -ɩn nyna i 'mʋa- nɩɛ 'de -ta -kwɛa i -o.
'Kamɔ Sosue' nʋ -cɛɛn'-.